Apple, bu ayın əvvəlində WWDC 2025 konfransında təqdim etdiyi yeni “Liquid Glass” (Maye Şüşə) interfeysi ilə bağlı əsas problemlərdən birini iOS 26 Beta 2-nin buraxılışı ilə aradan qaldırıb. Yeni interfeys iPhone, iPad və digər Apple cihazlarında əməliyyat sisteminin vizual görünüşünü yeniləyir. Dizaynın əsas xüsusiyyəti — şüşənin işığı sındırma və şəffaflıq xüsusiyyətlərindən ilham almasıdır.
Lakin ilkin beta versiyasını sınaqdan keçirən istifadəçilər yeni dizaynın bəzi çatışmazlıqlarını tez bir zamanda önə çəkmişdi. Xüsusilə də "Control Center" (idarəetmə paneli) hissəsi – iPhone ekranının sağ üst tərəfindən sürüşdürülməklə açılan menyu – istifadəçilər tərəfindən oxunmaz hesab olunmuşdu. Şəffaf fon, altındakı Ana Ekran (Home Screen) ikonları və widget-larla qarışaraq istifadəçinin interfeysdə seçim etməsini çətinləşdirirdi.
Apple bu problemi yeni beta versiyada aradan qaldıraraq Control Center fonunun bulanıqlığını artırıb. Bu da altındakı məzmunun daha az görünməsi və idarəetmə alətlərinin daha asan seçilməsi ilə nəticələnib.
Bildirişlərlə bağlı da oxşar şikayətlər var idi. İlk betada bildirişlərin oxunması çətin idi. Yeni versiyada bu problem bir qədər yaxşılaşdırılıb, lakin xüsusilə parlaq və açıq rəngli fonlarda hələ də bəzi oxunaqlılıq problemləri qalır.
Qeyd edək ki, iOS 26-nın son versiyasının bu payızda təqdim olunması gözlənilir və bu düzəlişlərin yekun olmadığını göstərir. Bununla belə, Apple şirkətinin istifadəçi rəylərinə həssas yanaşaraq dəyişikliklər etməsi müsbət qarşılanır.
Bundan əlavə, iOS 26 Beta 2-də digər yeniliklər də təqdim olunub:
- App Store-da tətbiqlərin səhifələrinə Əlçatanlıq (Accessibility) bölməsi əlavə olunub;
- iPad cihazlarında Journaling (Gündəlik yazıları) tətbiqi üçün iCloud sinxronizasiyası aktiv edilib;
- Apple Wallet-ə sifariş izləmə funksiyası gətirilib;
- Yeni Apple Music Radio widget-ı istifadəyə verilib və digər kiçik yeniliklər edilib.
- Bu dəyişikliklər Apple-ın iOS 26 ilə daha funksional və estetik cəhətdən müasir istifadəçi təcrübəsi təqdim etmək istədiyini göstərir.
