Amazon şirkətinin bulud xidmətləri bölməsi olan Amazon Web Services (AWS) bazar günü bildirib ki, Birləşmiş Ərəb Əmirliklərində yerləşən məlumat mərkəzlərindən birində obyektlərin binaya çırpılması nəticəsində yaranan qığılcım və yanğın səbəbilə elektrik enerjisi müvəqqəti olaraq dayandırılıb.
Birləşmiş Ərəb Əmirlikləri ABŞ və İsrailin İrana endirdiyi zərbələrdən sonra İran tərəfindən həyata keçirilən cavab xarakterli raket və pilotsuz uçuş aparatı hücumlarının təsiri altındadır. İranın zərbələri ölkə üzrə hava limanlarını, limanları və yaşayış məntəqələrini, eləcə də daha geniş Körfəz regionunu hədəf alıb.
AWS-in açıqlamasında bildirilir: “Sakit okean vaxtı ilə saat 04:30 radələrində mövcudluq zonalarımızdan biri (mec1-az2) məlumat mərkəzinə dəyən obyektlər səbəbilə zərər görüb, nəticədə qığılcım və yanğın baş verib.”
Şirkətin rəsmi saytına görə, “Mövcudluq Zonası” bir və ya daha çox fiziki məlumat mərkəzindən ibarət olur. Bu zonalar hər bir AWS regionu daxilində bir-birindən ayrılmış və izolyasiya olunmuş məkanlardır.
Yanğının söndürülməsi üçün hadisə yerinə cəlb olunan yanğınsöndürmə briqadaları iş apararkən obyektə elektrik enerjisinin verilməsi dayandırılıb.
Hadisənin İranın hücumları ilə əlaqəli olub-olmaması ilə bağlı sualı cavablandıran AWS bunu nə təsdiq, nə də təkzib edib.
Məlumat mərkəzinin operatoru bildirib ki, zərər görmüş zonada bağlantının tam bərpası bir neçə saat çəkə bilər. Bununla yanaşı, BƏƏ-dəki digər mövcudluq zonalarının normal fəaliyyət göstərdiyi qeyd olunub.
