Çinin Moonshot AI şirkəti tərəfindən təqdim edilən Kimi K3 süni intellekt modeli texnologiya bazarında və siyasi dairələrdə geniş müzakirələrə səbəb olub. Şirkət Kimi K3-ü 2,8 trilyon parametrə malik dünyanın ən böyük açıq mənbəli süni intellekt modeli kimi təqdim edir.
CNBC-nin məlumatına görə, model performans baxımından ABŞ-ın aparıcı süni intellekt sistemlərinə ciddi şəkildə yaxınlaşıb. Bu isə ABŞ-ın AI sahəsində texnoloji üstünlüyünü qoruyub-qoruyamayacağı ilə bağlı müzakirələri yenidən gündəmə gətirib.
Modelin təqdimatından sonra bazarlar da reaksiya verib. ABŞ-da yarımkeçirici istehsalçılarının səhmləri ucuzlaşıb. İnvestorlar daha aşağı xərclə rəqabətədavamlı AI modellərinin hazırlanmasının mümkün olmasının ABŞ-ın milyardlarla dollarlıq süni intellekt infrastrukturu investisiyalarının gəlirliliyinə təsir edə biləcəyindən narahatdırlar.
Kimi K3 Çin bazarında da rəqiblərə mənfi təsir göstərib. Honq Konq birjasında Zhipu şirkətinin səhmləri 28,4%, MiniMax-ın səhmləri isə 15,6% dəyər itirib. Analitiklər bunu 2025-ci ildə DeepSeek modelinin təqdimatından sonra yaşanan bazar reaksiyasına bənzədirlər.
ABŞ-da isə yeni müzakirələr başlayıb. Ekspertlər Vaşinqtonun Çin istehsalı açıq mənbəli AI modellərindən istifadəyə icazə verib-verməməsi və Çinin ABŞ texnologiyalarından faydalanmasının qarşısının necə alınacağı ilə bağlı debatların gücləndiyini bildirirlər.
Moonshot AI Kimi K3 modelinin hansı avadanlıq üzərində öyrədildiyini açıqlamayıb. Şirkətin Huawei ilə əməkdaşlıq etdiyi məlum olsa da, ABŞ-ın Nvidia-nın qabaqcıl AI çiplərinə tətbiq etdiyi ixrac məhdudiyyətlərinə baxmayaraq belə böyük modelin hazırlanması mövcud sanksiyaların effektivliyi ilə bağlı da suallar yaradıb.
