Google Google Wallet tətbiqinə 18 yaşdan kiçik istifadəçilər üçün yeni maliyyə idarəetmə funksiyası əlavə edib. Yenilik valideynlərə övladları üçün təhlükəsiz balans yaratmağa, eyni zamanda onların xərclərinə nəzarət etməyə imkan verir.
Şirkətin açıqlamasına görə, valideynlər uşaqlar üçün gündəlik xərcləmə limitləri təyin edə, bütün əməliyyat tarixçəsini izləyə və hər alış-veriş baş verdikdə bildiriş ala biləcəklər. Bundan əlavə, telefon itirildiyi halda hesabı uzaqdan kilidləmək və ya yenidən aktivləşdirmək, həmçinin istənilən vaxt müvəqqəti "xərcləmə fasiləsi" tətbiq edərək ödənişləri dayandırmaq mümkün olacaq.
Yeni funksiya sayəsində uşaqlar Android telefonları və Wear OS ağıllı saatları vasitəsilə Google Pay qəbul edilən bütün məntəqələrdə təmassız ödəniş edə biləcəklər. Google bildirir ki, bu yanaşma uşaqlara bank hesabı açmadan şəxsi vəsaitlərini idarə etməyi öyrətməyə kömək edəcək.
Bu yenilik Google Wallet-i Apple Cash Family kimi rəqib xidmətlərə, eləcə də Greenlight və FamZoo kimi uşaqlar üçün maliyyə savadlılığı həlləri təqdim edən startaplara daha da yaxınlaşdırır.
Hazırda funksiya mərhələli şəkildə ABŞ-da istifadəyə verilir. Google onun digər ölkələrdə nə vaxt istifadəyə veriləcəyi ilə bağlı hələlik məlumat paylaşmayıb.
Qeyd edək ki, Google ötən il bəzi ölkələrdə valideyn nəzarəti altında uşaqlara Google Wallet vasitəsilə rəqəmsal ödənişlər etməyə icazə vermişdi. Həmin yeniləmə ilə uşaqlar tədbir biletləri, kitabxana kartları və hədiyyə kartlarını da Google Wallet-də saxlaya bilirdilər.
