Uzun videolar dövrü
Instagram ABŞ və bəzi digər ölkələrdə 90 dəqiqəyədək uzunluqda videoların yüklənməsini sınaqdan keçirməyə başlayıb. TechCrunch yazır ki, bu addım uzun illər qısa, şaquli videoları ön plana çıxaran platformanın strategiyasında əhəmiyyətli dəyişiklikdir.
Yeni format hazırda ABŞ və Braziliyadakı məhdud sayda kontent yaradıcısı üçün əlçatandır. Platforma həmçinin qısa mikrodramları ayrı-ayrı epizodları birləşdirən serial formatında paylaşmaq funksiyasını sınaqdan keçirir. Belə videolarda digər epizodların mövcudluğunu göstərən işarə görünəcək. Bu funksiya hazırda ABŞ, Meksika və Hindistanda sınaqdan keçirilir. Instagram gələcəkdə onu əksər ölkələrdə istifadəyə verməyi planlaşdırır.
Bu, Instagram-ın uzun videolar sahəsində ilk cəhdi deyil. Platforma 2018-ci ildə YouTube-a alternativ kimi IGTV tətbiqini təqdim etmişdi. Lakin format kifayət qədər populyarlaşmadığından tətbiq 2021-ci ildə bağlandı və bir saata qədər videolar paylaşmaq imkanı əsas Instagram tətbiqinə köçürüldü.
