Apple-ın gələcək nəsil smartfonu — iPhone 18 Pro — peyklər vasitəsilə tam internet bağlantısı təqdim edə bilər. "Business Standard" və "MacRumors" kimi beynəlxalq texnologiya portallarının məlumatına görə, bu modellər artıq yalnız təcili hallarda istifadə olunan peyk əlaqə funksiyasını deyil, həm də real 5G səviyyəsində internet bağlantısını dəstəkləyə bilər.
Hazırda iPhone-larda peyk bağlantısı yalnız “Emergency SOS via Satellite” (Peyk vasitəsilə Təcili SOS), “Find My” (Məni Tap) və “Messages via Satellite” (Peyk vasitəsilə Mesajlar) kimi məhdud funksiyalarla məhdudlaşır.
Lakin yayılan son məlumatlara görə, Apple, SpaceX şirkətinin peyk internet xidməti olan Starlink və mobil operator T-Mobile ilə birgə əməkdaşlıq imkanı üzərində işləyir. Bu əməkdaşlıq reallaşarsa, iPhone 18 Pro istifadəçiləri baz stansiyalarına və ya mobil şəbəkəyə bağlı olmadan belə, birbaşa internetdən istifadə edə biləcəklər.
Mütəxəssislər hesab edirlər ki, bu addım mobil rabitə sənayesində inqilabi bir dönüş yarada bilər. Hələlik Apple tərəfindən bu xüsusiyyət rəsmi şəkildə təsdiqlənməyib, lakin iPhone 18 Pro-nun 2026-cı ilin payızında təqdim ediləcəyi gözlənilir.
