Sun-Ways İsveçrədə dəmir yolu relsləri arasında quraşdırılmış günəş elektrik stansiyasının ilk birillik sınaqlarını uğurla başa çatdırıb. Buttes bölgəsində fəaliyyət göstərən 100 metrlik pilot sahə 2025-ci ilin aprelində istifadəyə verilib və bu müddətdə 19 MVt/saatdan çox elektrik enerjisi istehsal edib.
Sınaq dövründə həmin rels sahəsindən 11 mindən çox qatar keçsə də, nə qatarların hərəkətində, nə də günəş panellərinin işində hər hansı problem qeydə alınmayıb.
Layihədə relslər arasında yerləşdirilmiş 48 fotovoltaik paneldən istifadə olunur. Şirkətin hesablamalarına görə, texnologiya İsveçrənin dəmir yolu şəbəkəsi boyunca tətbiq olunarsa, ildə təxminən 1 TVt/saat elektrik enerjisi istehsal etmək mümkün olacaq. Bu həcm ölkənin ictimai nəqliyyat sisteminin enerji tələbatının təxminən 30%-ni qarşılaya bilər.
Panellər maşinistlər üçün parıltının qarşısını alan xüsusi örtüklə və mikroçatlara qarşı əlavə qoruma ilə təchiz edilib. Sun-Ways həmçinin saatda 300 panel quraşdıra bilən xüsusi rels maşını hazırlayıb.
Şirkət texnologiyanı 2028-ci ildən kommersiya istifadəsinə çıxarmağı planlaşdırır. İlk mərhələdə 10 kilometrlik layihələrin həyata keçirilməsi, 2035-ci ilə qədər 1000 km, 2040-cı ilə qədər isə 10 min km dəmir yolu xəttində bu sistemin tətbiqi nəzərdə tutulur. Hazırda İtaliya, SNCF, Cənubi Koreya, İspaniya və Portuqaliya ilə əməkdaşlıq üzrə danışıqlar aparılır.
