Temu əqli mülkiyyət hüquqlarının qorunması proqramını genişləndirərək monitorinq etdiyi brendlərin sayını 15 minə çatdırdığını açıqlayıb. Bu göstərici ötən illə müqayisədə 3 dəfə artıb.
Şirkətin 2026-cı il Əqli Mülkiyyət Hüquqlarının Qorunması Hesabatına əsasən, ötən il platformaya qoşulmaq istəyən yeni satıcıların 40%-dən çoxu şəxsiyyət yoxlamasından keçmədiyi üçün qeydiyyatdan imtina alıb. Bundan əlavə, təkrar əqli mülkiyyət pozuntularına görə 16 mindən çox satıcı mağazası bağlanıb.
Temu bildirir ki, platformada yerləşdirilən məhsullar həm dərc edilməzdən əvvəl, həm də sonradan milyonlarla şəkil və açar sözdən ibarət məlumat bazası vasitəsilə avtomatik yoxlanılır. Məqsəd saxta məhsulların və müəllif hüquqlarını pozan elanların vaxtında aşkarlanmasıdır.
Yeniləmə Temunun Avropada artan tənzimləyici təzyiqlərlə üzləşdiyi dövrə təsadüf edir. 2025-ci ilin iyulunda Avropa Komissiyası Rəqəmsal Xidmətlər Aktı (DSA) çərçivəsində şirkətin platformasında qanunsuz məhsulların qarşısını kifayət qədər almadığını bildirmişdi. Bu pozuntu təsdiqlənərsə, Temu illik qlobal dövriyyəsinin 6%-dək məbləğində cərimə ilə üzləşə bilər.
