Çinin premium elektromobil istehsalçısı Li Auto öz çip inkişafı bölməsini ayrıca şirkətə çevirib. Şirkətin məlumatına görə, Xinchuang Zhihe (Shanghai) Technology Co., Ltd. adlı yeni müəssisə 13 iyul 2026-cı il tarixində 100 min yuan nizamnamə kapitalı ilə qeydiyyata alınıb və tamamilə Li Auto-ya məxsusdur.
Yeni yaradılan şirkət Li Auto-nun süni intellekt dəstəyi ilə işləyən avtomobil prosessorlarının hazırlanmasına cavabdeh olacaq. Müəssisə Mach M100 seriyalı çiplərin yaradılması prosesini tam şəkildə idarə edəcək. Buraya prosessor arxitekturasının layihələndirilməsi, IP bloklarının hazırlanması, kompilyatorların hazırlanması, çiplərin istehsalı və avtomobillərdə istifadədən əvvəl sınaq mərhələləri daxildir.
Bu addım Li Auto-nun avtomobil texnologiyalarında xarici təchizatçılardan asılılığını azaltmaq və öz proqram-aparat ekosistemini gücləndirmək strategiyasının bir hissəsi hesab olunur. Şirkət gələcək nəsil ağıllı avtomobillərində süni intellekt funksiyalarını daha effektiv idarə etmək üçün xüsusi hazırlanmış çiplərə üstünlük verir.
Qeyd edək ki, Çin elektromobil bazarında bu yanaşmanı tətbiq edən ilk şirkət Li Auto deyil. Bundan əvvəl Nio da avtomobil çiplərinin hazırlanması istiqamətini ayrıca törəmə şirkət – Anhui Shenji Technology vasitəsilə inkişaf etdirməyə başlamışdı.
2015-ci ildə təsis edilən Li Auto premium seqmentdə fəaliyyət göstərən Çin avtomobil istehsalçılarından biridir. Şirkət əsasən ağıllı elektromobillər və uzun yürüş ehtiyatına malik hibrid avtomobillər istehsal edir.
