Meta şirkəti süni intellekt sahəsindəki strategiyasını kökündən dəyişməyə hazırlaşır. Bloomberg-in məlumatına görə, şirkət illərdir dəstəklədiyi açıq mənbə siyasətindən imtina edərək, rəqibləri Google və OpenAI kimi qapalı və pullu sistemə keçməyi planlaşdırır. Avocado kod adı verilən yeni modelin 2026-cı ilin yazında təqdim edilməsi gözlənilir. Bu yeni sistem hamıya açıq olmayacaq, əksinə, giriş ciddi şəkildə nəzarətdə saxlanılacaq və pullu abunə əsasında təklif ediləcək.
Bu kəskin dönüşün əsas səbəbi şirkətin əvvəlki uğursuzluğu ilə bağlıdır. Belə ki, 2025-ci ilin əvvəlində təqdim edilən Llama 4 modeli həm Silikon Vadisini, həm də Mark Zukerberqi məyus edib. Gözləntiləri doğrultmayan bu layihədən sonra Zukerberq komandanın tərkibini yeniləyib və diqqəti birbaşa gəlir gətirə biləcək layihələrə yönəldib. O, hazırda TBD Lab adlı yeni komanda ilə birlikdə işləyir və prosesə şəxsən nəzarət edir.
Şirkətin süni intellekt yarışında geri qaldığını düşünən rəhbərlik, vəziyyəti düzəltmək üçün işəgötürmə siyasətinə başlayıb. Meta onlarla milyon dollar maaş təklif edərək Apple-ın süni intellekt şöbəsinin rəhbərini, eləcə də OpenAI və Anthropic kimi aparıcı şirkətlərdən təcrübəli tədqiqatçıları öz tərəfinə çəkib. Həmçinin, GitHub-ın keçmiş rəhbəri Nat Fridman məhsul inkişafına, Scale AI-nin qurucusu Aleksandr Van isə superintellekt laboratoriyasına rəhbərlik edəcək.
