Microsoft şirkəti Pakistandakı yerli fəaliyyətini dayandırdığını açıqlayıb. Bu qərar, şirkətin regionda 25 ildən artıq davam edən fəaliyyətinə son qoyur və onun Cənubi Asiya bazarındakı strateji yanaşmasında dəyişiklik kimi qiymətləndirilir.
Redmond mərkəzli texnologiya nəhəngi açıqlamada bildirib ki, Pakistan bazarında yeni fəaliyyət modelinə keçid edir və bundan sonra müştərilərə “yenə də yüksək səviyyəli xidmət göstəriləcək”, lakin bu, artıq yerli əməkdaşlar vasitəsilə deyil, bölgəyə yaxın digər ofislər və rəsmi partnyorlar vasitəsilə həyata keçiriləcək.
Microsoft-un sözçüsünün dediyinə görə, müştəri müqavilələri və xidmət keyfiyyəti bu dəyişiklikdən təsirlənməyəcək:
“Bu modeli dünyanın bir çox ölkəsində uğurla tətbiq edirik. Müştərilər bizim üçün prioritet olaraq qalır.”
Bu qərar Pakistanda fəaliyyət göstərən beş Microsoft əməkdaşına təsir göstərəcək. Microsoft-un Pakistanda heç bir mühəndis heyəti olmayıb, əsas diqqət Azure və Office məhsullarının satışına yönəlib. Qonşu Hindistandan fərqli olaraq, Pakistan Microsoft-un mühəndislik və inkişaf mərkəzlərindən biri kimi inkişaf etdirilməyib.
Pakistanın Rəqəmsal İnkişaf və Telekommunikasiya Nazirliyi Microsoft-un qərarını "qlobal restrukturizasiya və işçi heyətinin optimallaşdırılması siyasəti" çərçivəsində qiymətləndirib. Qeyd edək ki, şirkət bu həftə ərzində qlobal miqyasda 4% işçi ixtisarına (təxminən 9,000 nəfər) gedib.
Microsoft bu keçidə əvvəlcədən hazırlaşmışdı. Son bir neçə il ərzində şirkət Pakistan üzrə lisenziya və kommersiya müqavilələrinin idarəçiliyini İrlandiyadakı Avropa mərkəzinə köçürmüşdü. Gündəlik texniki və kommersiya xidmətlərini isə sertifikatlı yerli partnyorlar təmin edirdi.
Pakistan hökuməti, Microsoft-un regional və beynəlxalq rəhbərliyi ilə əlaqəni davam etdirərək, bu struktur dəyişikliklərinin ölkənin texnologiya sektoruna mənfi təsir göstərməməsinə çalışacaqlarını bildirib.
Microsoft-un Pakistandakı ilk rəhbəri Cəvvad Rəhman isə LinkedIn paylaşımında bu qərarı tənqid edərək bildirib:
“Bu, təkcə korporativ çıxış deyil – bu, ölkənin yaratdığı mühitin nəticəsidir. Elə bir mühit ki, hətta Microsoft kimi qlobal nəhənglər belə burada fəaliyyət göstərməyi dayandırır.”
Əlamətdar haldır ki, bu qərar Pakistan hökumətinin Google və Microsoft kimi şirkətlərlə 500 min gəncə texniki sertifikatlar təqdim etmək planı açıqlanmasından bir neçə gün sonraya təsadüf edir. Google isə keçən il ölkənin təhsil sisteminə 10.5 milyon dollar investisiya yatırıb və 2026-cı ilə qədər Pakistanda 500 min Chromebook istehsal etməyi planlaşdırır.
Ekspertlər bildirirlər ki, Microsoft-un çıxışı Pakistanın texnoloji sektorunda struktur problemlərin göstəricisidir. Ölkə, Hindistan və digər qonşu bazarlardan fərqli olaraq, Qərb texnologiya şirkətləri üçün mühəndislik və proqram təminatı ixracatçısı kimi formalaşmayıb. Əvəzində, bazarda ya yerli texnoloji şirkətlər, ya da Huawei kimi Çin nəhəngləri üstünlük təşkil edir.
Pakistanın Rəqəmsal İnkişaf Nazirliyi isə məsələ ilə bağlı media sorğularına cavab verməyib.
