Microsoft, veb-saytlarda süni intellekt əsaslı çatbotların yaradılmasını sadələşdirmək məqsədilə NLWeb adlı açıq mənbəli yeni layihəsini təqdim edib. Layihə, 2025-ci ilin Build konfransı çərçivəsində ictimaiyyətə elan olunub.
NLWeb istifadəçilərə yalnız bir neçə sətir kod yazmaqla, istədikləri süni intellekt modeli və öz məlumat bazaları əsasında veb-saytlarına konversasional interfeys (yəni mətn sahəsi və göndər düyməsi olan çat pəncərəsi) əlavə etməyə imkan verir.
Məsələn, bir pərakəndə satış saytı NLWeb vasitəsilə istifadəçilərə səyahətlər üçün geyim seçməyi tövsiyə edən çatbot qura bilər. Eyni şəkildə, aşpazlıq saytı reseptlə uyğun yeməkləri təklif edən süni intellekt köməkçisi yarada bilər.
NLWeb ilə yaradılan veb-səhifələr, istəyə uyğun olaraq Anthropic şirkətinin təqdim etdiyi Model Connection Protocol (MCP) standartını dəstəkləyən süni intellekt platformaları üçün açıq və əlçatan edilə bilər. MCP, AI modellərinin məlumatların yerləşdiyi sistemlərlə birbaşa əlaqə qurmasına imkan verir.
Microsoft-un TechCrunch-a təqdim etdiyi press-relizdə qeyd olunur:
“NLWeb texnologiyasının, agentik veb sahəsində HTML qədər önəmli rol oynaya biləcəyinə inanırıq. Bu, istifadəçilərə veb məzmunla daha zəngin və semantik şəkildə qarşılıqlı əlaqə qurmağa şərait yaradır.”
Layihənin mənşəyi də maraq doğurur. Microsoft bu barədə rəsmi açıqlama verməsə də, NLWeb texnologiyasının OpenAI-nin hazırladığı ilkin prototiplərə əsaslana biləcəyi ehtimal olunur.
The Information nəşri 2024-cü ilin noyabrında xəbər vermişdi ki, OpenAI bu texnologiyanın ilkin versiyasını Condé Nast, Redfin, Eventbrite və Priceline kimi partnyorlarla birgə sınaqdan keçirirdi. O zaman layihə, ChatGPT-yə bənzər çat funksiyalarını brendlərin veb-saytlarına inteqrasiya etmək məqsədi daşıyırdı. Lakin texniki çətinliklər səbəbindən layihənin inkişafı bir müddət gecikmişdi.
İndi isə görünür ki, NLWeb daha yetkin və istifadəyə hazır şəkildə təqdim olunur — ilkin planlarla müqayisədə müəyyən dəyişikliklərlə.
