Mikayıl Cabbarov ABŞ-nin SpaceX şirkətinin vitse-prezidenti Stefani Bednarek ilə görüş keçirib. Nazir bu barədə sosial şəbəkə hesabında məlumat verib.
Cabbarov qeyd edib ki, görüş Azərbaycan Prezidenti İlham Əliyevin ABŞ-yə işgüzar səfəri çərçivəsində, SOCAR-ın prezidenti Rövşən Nəcəflə birlikdə baş tutub.
Onun sözlərinə görə, görüş zamanı Azərbaycanın iqtisadi potensialı, strateji inkişaf istiqamətləri və əlverişli investisiya mühiti vurğulanıb. Tərəflər SpaceX ilə əməkdaşlıq perspektivlərini, o cümlədən qabaqcıl kosmik texnologiyaların tətbiqi, süni intellekt əsaslı həllərin inteqrasiyası və biliklərin ötürülməsi, potensialın artırılması məqsədilə strukturlaşdırılmış tərəfdaşlıq imkanlarını müzakirə ediblər.
Mənbə: Caliber
