OpenAI 2026-cı ilin ikinci yarısında ilk süni intellekt əsaslı cihazını təqdim etməyi planlaşdırır. Bu barədə şirkətin qlobal siyasət üzrə rəhbəri Kris Lihayn Davosda keçirilən Axios House konfransında məlumat verib. Onun sözlərinə görə, bu tarix “ən real” variantdır, lakin təqdimat vaxtı dəyişdirilə də bilər.
Lihayn “cihazlar” istiqamətini OpenAI üçün 2026-cı ilin əsas nailiyyətlərindən biri adlandırıb. O, yeni məhsulun hansı form-faktorda olacağı — sancaq, qulaqlıq və ya başqa bir cihaz — barədə şərh verməkdən imtina edib.
Yanvarın ortalarında Smart Pikachu ləqəbli insayder X sosial şəbəkəsində tədarük zəncirindəki mənbələrə istinadən yazmışdı ki, OpenAI AirPods-a “alternativ” olacaq qulaqlıqlar üzərində işləyir. Daxili kod adı Sweetpea olan bu cihaz yumurta formasında keyslə və qulağın arxasına yerləşdirilən iki “kapsul”dan ibarət olacaq.
İnsayderin məlumatına görə, təqdimat 2026-cı ilin sentyabr ayına planlaşdırılıb. Foxconn şirkətinin isə 2028-ci ilin dördüncü rübünə qədər beş milyonadək cihazın istehsalına hazırlaşacağı bildirilir.
Bundan əvvəl, 2025-ci ilin oktyabrında Financial Times mənbələrə istinadən yazmışdı ki, OpenAI ovuc içi ölçüsündə, ekransız bir cihaz üzərində çalışır. Bu qurğu səs və vizual siqnalları qəbul edərək istifadəçi sorğularına cavab verə biləcək. Ehtimallara görə, bu, “ağıllı” dinamik ola bilər. Oxşar məlumatlar daha əvvəl The Information tərəfindən də yayımlanmışdı.
Qeyd olunur ki, OpenAI bu cihazı məşhur dizayner Coni Ayv ilə birgə hazırlayır. Ayv 2019-cu ildə Apple-dan ayrıldıqdan sonra LoveFrom adlı dizayn studiyasını qurub. 2025-ci ilin iyulunda isə OpenAI onun Io adlı startapını 6,5 milyard dollara satın alıb.
