Özbəkistanın ilk ‘unicorn’u Uzum yeni investisiya raundunda 65,5 milyon dollar investisiya cəlb edərək dəyərini 1,5 milyard dollara çatdırıb. Raunda Çin texnologiya nəhəngi Tencent, ABŞ və Böyük Britaniyanın VR Capital fondu, həmçinin ABŞ-də yerləşən FinSight Capital rəhbərlik edib.
2022-ci ildə qurulan Uzum fəaliyyətinə “Uzum Market” adlı e-ticarət platforması ilə başlayıb. Qısa müddətdə fintex sahəsinə keçərək debit kart xidməti təqdim edib və “Uzum Tezkor” brendi ilə sürətli ərzaq çatdırılmasına start verib.
Hal-hazırda startapın aylıq aktiv istifadəçi sayı 17 milyondur. 2025-ci ilin ilk yarısında Uzum-un ümumi məhsul dəyəri (GMV) 250 milyon dollar təşkil edib ki, bu da ötən ilin eyni dövrü ilə müqayisədə 1,5 dəfə çoxdur.
Startapın maliyyə bölməsi olan Uzum Bank 2024-cü ilin avqustunda Visa ilə birgə brendli debit kart təqdim edib. Artıq 2 milyon kart dövriyyədədir, ilin sonuna qədər bu rəqəmin 5 milyona çatacağı gözlənilir. Kredit portfeli 200 milyon dollar, xalis gəliri isə 150 milyon dollar olub – hər ikisində kəskin artım var.
Təsisçi və CEO Cəsur Cumaev bu uğuru yerli bazar biliklərinin beynəlxalq təcrübə ilə birləşməsində görür.
Uzum-un qurduğu infrastruktur 112,000 m²-lik anbar sahəsi və gündəlik 200,000-dən çox sifariş emalı gücünə malikdir. Ölkə üzrə 1,500-dən çox çatdırılma və kart paylama nöqtəsi fəaliyyət göstərir.
Əvvəllər operator çatdırılması ilə işləyən Uzum, artıq satıcıların öz çatdırılma sistemlərini inteqrasiya etməsinə imkan yaradır. Çatdırmaların 20–30%-nin bu model üzrə aparılması planlaşdırılır. Hazırda 1,5 milyondan çox məhsul çeşidi mövcuddur.
Tencent-in iştirakı, Uzum-un sürətli böyümə göstəricilərinə əsaslanır. Startap yaxın aylarda depozit məhsulları və uzunmüddətli kreditlər təqdim etməyi planlaşdırır. Eyni zamanda QR ödənişləri, satıcı bazası və KOB-lar üçün dəstək alətləri üzərində işləyir.
Eyni zamanda, Çin və Türkiyədən satıcıların platformaya qoşulması ilə sərhədlərarası satışların artırılması hədəflənir. Gələcəkdə bu satışların ümumi dövriyyənin 10–15%-ni təşkil edəcəyi gözlənilir.
Hazırda Uzum-da 12,000-dən çox əməkdaş çalışır. Startap 2026-cı ilin ilk yarısında 250–300 milyon dollarlıq yeni investisiya raundunu tamamlayaraq, sonrasında IPO keçirməyi planlaşdırır.
Uzum, Mərkəzi Asiyada ən sürətlə böyüyən və beynəlxalq investorlar üçün cəlbedici startap nümunələrindən biri hesab olunur.
