Telegram-ın qurucusu Pavel Durov messencerin qısa müddətlik App Store-dan silinməsi ilə bağlı açıqlama verib. Onun sözlərinə görə, hadisə moderasiya sistemindəki problem deyil, platformaya qarşı təşkil olunmuş məqsədli hücumun nəticəsi olub.
Durov bildirib ki, hücum edən şəxs yeni paylaşım etmək əvəzinə köhnə bir mesajı redaktə edərək süni intellektlə hazırlanmış qadağan olunmuş məzmun əlavə edib. Mesaj uzun müddət əvvəl paylaşılmış olduğundan istifadəçilərin əksəriyyəti dəyişiklikdən xəbərsiz qalıb və moderasiya sistemi buna dərhal reaksiya verə bilməyib.
Onun sözlərinə görə, bu üsuldan istifadə edən şəxslər böyük Telegram kanalları və qruplarının sahiblərindən pul tələb edir, əks halda qadağan olunmuş məzmun yerləşdirərək Apple-a şikayət edirlər. Məqsəd həmin icmaların və ya tətbiqin özünün müvəqqəti bloklanmasına nail olmaqdır.
Telegram komandası qadağan olunmuş məzmunu silib və qaydanı pozan hesabı blokladıqdan sonra Apple tətbiqi yenidən App Store-a qaytarıb.
Durov eyni zamanda Apple-ın addımını tənqid edərək bildirib ki, şirkət əvvəlcə Telegram-ı mağazadan silib, yalnız bundan sonra inkişaf etdiricilərlə əlaqə saxlayıb. Onun fikrincə, bu yanaşma istifadəçi məzmununa əsaslanan bütün böyük platformalar üçün risk yaradır.
