Qadınların kişilərlə görüş təcrübələrini anonim şəkildə paylaşa bildiyi “Tea” adlı mobil tətbiqdə ciddi məlumat sızması baş verib. Şirkət şənbə günü Reuters-ə açıqlamasında bildirib ki, təxminən 72 min istifadəçiyə məxsus fotoşəkillər hakerlər tərəfindən ələ keçirilib.
Tətbiqin sözçüsünün açıqlamasına görə, “sistemlərimizə icazəsiz müdaxilə” qeydə alınıb. Nəticədə, istifadəçilərin hesab təsdiqləməsi üçün göndərdikləri 13 min selfi və şəxsiyyət vəsiqəsi şəkilləri, həmçinin paylaşımlar, şərhlər və şəxsi mesajlardan toplanmış 59 min şəkil ifşa olunub.
Şirkət bildirib ki, hadisənin araşdırılması üçün müstəqil kibertəhlükəsizlik mütəxəssisləri cəlb olunub və sistemlərin qorunması üçün 24/7 işləyirlər. E-poçt ünvanları və telefon nömrələrinin sızmadığı, yalnız 2024-cü ilin fevral ayına qədər qeydiyyatdan keçmiş istifadəçilərin təsirləndiyi qeyd olunub.
İlk olaraq bu məlumat sızması barədə cümə günü 404 Media məlumat yayıb.
“Tea” tətbiqi qadınlara görüşdükləri kişilər haqqında Yelp tərzində anonim rəy yazmaq imkanı verir. İstifadəçilər yalnız təsdiqləmə mərhələsindən keçdikdən sonra bu imkandan istifadə edə bilirlər. Tətbiq qadınların görüş zamanı təhlükəsizliyini ön planda saxladığını iddia edir və son günlərdə iki milyondan çox qadının platformaya qoşulmaq üçün müraciət etdiyini bildirib.
Qeyd edək ki, “Tea” tətbiqinə qoşulmaq üçün istifadəçilərdən selfi göndərmək tələb olunur. Şirkət bu şəkillərin yoxlamadan sonra silindiyini bildirir.
