OpenAI şirkəti ChatGPT-nin şəkil yaratma funksiyasını WhatsApp platformasına inteqrasiya edib və bu imkanı bütün istifadəçilər üçün pulsuz şəkildə əlçatan edib. İstifadəçilər artıq WhatsApp vasitəsilə ChatGPT ilə yazışaraq süni intellektin yaratdığı təsvirlərdən faydalana biləcəklər. Bu funksiya əvvəl yalnız ChatGPT-nin mobil tətbiqində və veb saytında mövcud olsa da, son yeniləmə ilə WhatsApp üzərindən də istifadəyə verilib.
Yeni funksiyadan istifadə etmək üçün istifadəçilər “1-800-ChatGPT” nömrəsini WhatsApp kontaktlarına əlavə etməli və bu nömrəyə mesaj göndərərək şəkil yaratmaq istədiklərini bildirməlidirlər. Hazırda gündə yalnız bir şəkil yaratmaq hüququ verilir. Daha çox şəkil yaratmaq istəyən istifadəçilər isə öz ChatGPT hesabları ilə bağlantı quraraq əlavə imkanlar əldə edə bilərlər.
Bu yenilik WhatsApp-ın gündəlik istifadəçiləri üçün süni intellekt texnologiyalarını daha əlçatan edir və kreativlik imkanlarını genişləndirir. Studio Ghibli üslubunda şəkillərlə böyük maraq qazanan bu vizual alət, istifadəçilərə öz təsəvvürlərini bir neçə cümlə ilə ifadə edib onu şəkilə çevirməyə imkan verir. Yeni funksiyanın istifadəyə verilməsi ChatGPT-nin istifadəsini daha rahat və inteqrasiya olunmuş hala gətirərək, süni intellekt texnologiyalarının gündəlik həyatın bir parçası olmasına töhfə verir.
