Salesforce bulud əsaslı məlumat idarəetmə şirkəti Informatica-nı 8 milyard dollarlıq səhm müqaviləsi ilə satın alaraq süni intellekt və məlumat infrastrukturu sahəsində gücünü artırmaq istiqamətində böyük addım atıb.
Bu barədə məlumat mayın 27-də verilib. Satınalma xəbəri bir il əvvəl səslənən şayiələrdən sonra gəlib. O zaman Informatica şirkəti satılmadığını bildirib, lakin bir ildə vəziyyət dəyişib.
Müqavilənin şərtlərinə əsasən, Salesforce Informatica-nın A və B-1 sinif səhm sahiblərinə hər səhm üçün 25 dollar nağd pul ödəyəcək.
1993-cü ildə təsis olunmuş Informatica 100-dən çox ölkədə 5,000-dən artıq müştəriyə xidmət göstərir və hazırda şirkətin bazar kapitallaşması 7.1 milyard dollar təşkil edir.
Salesforce-un mətbuat xidmətinin açıqlamasına görə, bu satınalma şirkətin agentli süni intellekt istiqamətindəki hədəflərini gücləndirəcək, məlumat infrastrukturu və idarəçiliyini möhkəmləndirərək süni intellekt agentlərinin müasir müəssisələrdə təhlükəsiz, məsuliyyətli və geniş miqyasda işləməsini təmin edəcək.
Salesforce-un CEO-su Mark Benioff bildirib: “Birlikdə Agentforce, Data Cloud, Tableau, MuleSoft və Customer 360 məhsullarını gücləndirərək, müəssisələr üçün ağıllı, kontekstual və etibarlı avtonom agentlər təqdim edəcəyik. Bu, təhlükəsiz, məsuliyyətli və dünyanın məlumatları ilə dərin inteqrasiya olunmuş müəssisə səviyyəli süni intellektin inkişafında inqilabi addımdır.”
Satınalma prosesi 2024-cü ilin aprelində başlayıb. O zaman bazar reaksiyası mənfi olub və hər iki şirkətin səhm qiymətləri düşüb. Informatica isə satış danışıqlarını təkzib edib. Lakin bu gün rəsmi elan edilib ki, satış baş tutub.
Qeyd edək ki, Informatica Salesforce-un son bir ildə aldığı ilk məlumat idarəetmə şirkəti deyil. 2024-cü ilin sentyabrında Salesforce Own Company-ni 1.9 milyard dollara satın almışdı.
Salesforce-un baş meneceri Stiv Fišer o zaman deyib: “Məlumat təhlükəsizliyi heç vaxt indiki qədər vacib olmayıb. Own şirkətinin təcrübəsi və məhsulları müştərilərimizə etibarlı məlumat qorunması və idarəçiliyi həlləri təqdim etmək imkanlarımızı artıracaq.”
Hazırda TechCrunch saytı Salesforce-dan əlavə məlumat almağa çalışır.
