Bloomberg-in məlumatına görə, İlon Maskın rəhbərlik etdiyi SpaceX şirkəti gələn il birjaya çıxmaq üçün hazırlıqlara başlayıb. Hər şey planlaşdırıldığı kimi getsə, bu, dünya tarixində ən böyük ilkin kütləvi təklif (IPO) olacaq. Şirkət bu prosesdən 30 milyard dollardan çox vəsait toplamağı hədəfləyir. Bu rəqəm reallaşarsa, SpaceX indiyə qədər 29 milyard dollar toplayaraq rekord qıran Səudiyyənin neft nəhəngi Saudi Aramco-nu geridə qoyacaq.
Ümumi bazar dəyəri hədəfi isə 1.5 trilyon dollardır. Bu nəticə ilə SpaceX, 1.7 trilyon dollarla birjaya girən Saudi Aramco-dan sonra tarixin ən dəyərli ikinci açılışı kimi mövqeyini möhkəmləndirəcək. Mənbələr prosesin 2026-cı ilin ikinci yarısında baş tutacağını bildirir, lakin bazardakı vəziyyətdən asılı olaraq tarix 2027-ci ilə də keçirilə bilər.
Əldə ediləcək nəhəng vəsaitin bir hissəsinin son dövrlərdə texnologiya liderlərinin tez-tez bəhs etdiyi kosmos əsaslı məlumat mərkəzlərinin yaradılmasına sərf olunması gözlənilir. Bu qərarın verilməsində əsas rolu isə Starlink oynayır. Peyk interneti xidmətinin böyük uğuru şirkətin gəlirlərini kəskin artırıb; bu il 15 milyard dollar olan gəlirin gələn il 23 milyard dollara çatması proqnozlaşdırılır.
