Alman avtomobil istehsalçısı Volkswagen 2026-cı ilin ikinci yarısından etibarən Çin bazarı üçün istehsal olunan yeni modellərə süni intellekt agentləri inteqrasiya edəcəyini açıqlayıb. Bu texnologiya şirkətin yalnız Çin üçün hazırlanmış elektron arxitekturası üzərində qurulacaq.
Şirkət bildirib ki, yeni sistem Çinli çip istehsalçısı Horizon Robotics ilə birgə hazırlanıb və adi səsli köməkçilərlə müqayisədə daha mürəkkəb tapşırıqları yerinə yetirə bilir.
Volkswagen Çin rəhbəri Ralf Brandstaetter-in sözlərinə görə, bu sistem restoran tapmaq, masa rezerv etmək, sürücünü həmin ünvana yönləndirmək və hətta parkinq təşkil etmək kimi funksiyaları yerinə yetirə biləcək.
Bu addım şirkətin Çin bazarında elektromobillər və proqram təminatı sahəsində yerli rəqiblərlə rəqabətdə geri qalmamaq cəhdinin bir hissəsidir. Eyni zamanda, qiymət təzyiqləri və inkişaf sürətinin artırılması tələbi də bu qərara təsir göstərir.
Volkswagen həmçinin 2030-cu ilə qədər Çində 20-dən çox elektrikləşdirilmiş avtomobil və ümumilikdə 50 yeni model təqdim etməyi planlaşdırır.
