Yandex Moskva Səhiyyə Departamenti ilə birgə tibb müəssisələrində robot-kuryerlərin istifadəsi üzrə pilot layihəyə start verib. Layihə çərçivəsində avtonom roverlər artıq paytaxtın bir neçə xəstəxanasında fəaliyyət göstərir.
Robotlar xəstəxana korpusları arasında hərəkət edərək dərman vasitələri, tibbi sərf materialları və laborator analizlər üçün biomaterialların daşınmasını həyata keçirir. Onlar həm planlı reyslər (məsələn, gün ərzində bir neçə dəfə qan nümunələrinin laboratoriyaya çatdırılması), həm də təcili sifarişlər üzrə işləyir.
Xüsusi temperatur rejimi tələb edən yüklər üçün termokonteynerlərdən istifadə olunur, robotların yük bölməsi isə mütəmadi dezinfeksiya edilir. Layihənin tətbiqi mövcud infrastruktura dəyişiklik etmədən həyata keçirilib – robotlar hazır yollar və keçidlər üzərindən hərəkət edir.
Təşəbbüsün əsas məqsədi logistika proseslərini avtomatlaşdırmaqla həkim və tibb personalının xəstələrə daha çox vaxt ayırmasını təmin etməkdir.
