Uzun müddətdir işləməyən “BakiKart” tətbiqi nəhayət yenilənmiş versiyada istifadəyə verilib. Yeni versiya vizual baxımdan bir sıra dəyişikliklərə məruz qalıb və istifadəçilərin əvvəlcədən yüklədiyi balanslar yenidən bərpa edilib.
Lakin diqqətçəkən məqam odur ki, əvvəl daha funksional olan tətbiq indi məhdud imkanlarla fəaliyyət göstərir. Yeni versiya hazırda yalnız ictimai nəqliyyatda ödənişlər üçün nəzərdə tutulub. Əvvəllər tətbiqdə marşrutların canlı xəritəsi kimi faydalı funksiyalar mövcud idi, lakin bu xüsusiyyət artıq istifadəyə verilmir. Marşrut xəritələrinin gələcəkdə “AYNA MaaS” adlı yeni tətbiqdə əlçatan olacağı bildirilir. Bu barədə məlumatı “AYNA” nümayəndəsi paylaşıb.
Ümumilikdə, yenilənmiş “BakiKart” tətbiqi əvvəlkindən daha az funksiya ilə işlək vəziyyətdədir və əsas məqsədi sadələşdirilmiş interfeys təqdim etməklə onlayn ödənişləri və “BakiKart” fiziki kartlarını dəstəkləməkdir.
