Adobe, marketinq xidmətləri portfelini genişləndirmək məqsədilə axtarış sistemlərinin optimizasiyası (SEO) üzrə ixtisaslaşmış Semrush startapını təxminən 1,9 milyard dollara satın almaq barədə razılığa gəlib. Razılaşmaya əsasən, Adobe Semrush-ın hər səhmi üçün 12 dollar ödəyəcək ki, bu da şirkətin xəbərdən əvvəlki birja qiymətindən demək olar ki, iki dəfə yüksəkdir.
Adobe-un satın aldığı bu platforma, 2008-ci ildə rəqəmsal marketinq dünyasını daha şəffaf etmək istəyən iki rusiyalı proqramçı – Oleq Şeqolev və Dmitri Melnikov tərəfindən təsis edilib. Texniki təməlləri və ilkin inkişafı Sankt-Peterburqda başlasa da, təsisçilər startapı qlobal səviyyəyə çıxarmaq üçün baş qərargahı ABŞ-nin Boston şəhərinə köçürüblər və şirkət 2021-ci ildə birjaya çıxaraq beynəlxalq statusunu möhkəmləndirib.
Adobe-un bu strateji addımı istifadəçi davranışlarındakı ciddi dəyişikliklərlə əlaqələndirilir. İnsanlar artıq xəbər oxumaq, resept tapmaq və ya alış-veriş etmək üçün ənənəvi axtarış sistemlərindən daha çox süni intellekt çatbotlarına üz tuturlar. Statistikaya görə, son bir ildə süni intellekt çatbotlarından pərakəndə satış saytlarına yönləndirilən trafik 1200% artıb. Buna görə də Adobe, şirkətlərin gələcəkdə ənənəvi SEO ilə yanaşı, "Generativ Mühərrik Optimizasiyası"na (GEO) – yəni ChatGPT, Claude və digər Sİ platformalarında görünməyə daha çox sərmayə qoyacağını proqnozlaşdırır. Semrush-ın illər ərzində topladığı təcrübə Adobe-a bu yeni dövrdə marketoloqlara daha geniş imkanlar təqdim etməyə şərait yaradacaq.
