Apple şirkətinin 2026-cı ilin sentyabrından etibarən rəhbəri olacaq John Ternus şirkətin dizayn komandasının əvvəlki təsir gücünü geri qaytarmağı hədəfləyir. Bu barədə Bloomberg-in tanınmış texnologiya icmalçısı Mark Gurman məlumat verib.
Məlumata görə, Steve Jobs və keçmiş baş dizayner Jony Ive dövründə sənaye dizaynı şöbəsi Apple-ın əsas qərarverici mərkəzlərindən biri hesab olunurdu və şirkətin gələcək məhsullarının formalaşmasında həlledici rol oynayırdı.
Lakin son illərdə dizayn komandasının təsiri azalıb. Bunun əsas səbəbləri arasında Jony Ive-ın əvvəlcə idarəetmədən uzaqlaşması, daha sonra isə şirkətdən tam ayrılması, həmçinin bir sıra vacib əməkdaşların Apple-ı tərk etməsi göstərilir. Nəticədə məhsul strategiyasına maliyyə və əməliyyat bölmələrinin təsiri artıb.
Bu dəyişikliklər Apple məhsullarında da özünü göstərir. Şirkət cihazlarını mütəmadi yeniləsə də, yeni dizayn yanaşmaları və form-faktorlar əvvəlki illərlə müqayisədə daha az təqdim olunur. Məsələn, Apple Watch və Mac xətti artıq on ildən çoxdur ki, ümumilikdə tanış görünüşünü qoruyub saxlayır.
Bloomberg-in məlumatına əsasən, Ternus bu vəziyyəti dəyişmək niyyətindədir. O, ilk növbədə yeni baş dizayner təyin etməyi planlaşdırır. Yeni rəhbərin şirkətin idarəetmə masasında söz sahibi olması, geniş səlahiyyətlərə malik olması və innovativ, “sıçrayış yaradan” dizaynlar təqdim edə bilməsi gözlənilir.
Con Ternusun fikrincə, dizayn Apple-ın fəaliyyətinin təməlidir və şirkətin məhsulları əksər istifadəçilərin sahib olduğu ən estetik və ən yaxşı düşünülmüş texnoloji cihazlar sırasında yer almalıdır.
