Rəqəmsal İnkişaf və Nəqliyyat nazirinin müavini Saməddin Əsədov "Critical Infrastructure Defence Challenge-2025" tədbirində çıxışı zamanı ölkədə kibertəhlükəsizliyin təmin edilməsi istiqamətində görülən işlər barədə məlumat verib.
Yeni İnformasiya Mübadiləsi Platforması
Nazir müavini ölkə səviyyəsində informasiya mübadiləsini təşkil etmək və müasir təhdidlərdən qorunmaq məqsədilə açıq mənbələr əsasında xüsusi kibertəhdid və insidentlərin mübadiləsi platformasının yaradıldığını diqqətə çatdırıb. Artıq 30-dan çox dövlət qurumu bu platformaya qoşulub.
Beynəlxalq Əməkdaşlıq və Koordinasiya
Saməddin Əsədov qeyd edib ki, Milli Kompüter İnsidentlərinə Qarşı Mübarizə Mərkəzi (CERT) ilə beynəlxalq CERT-lər arasında vahid məlumatlandırma mexanizmlərinin qurulması işlərinə başlanılıb. Bununla yanaşı, təhdidlərin qiymətləndirilməsi, dövlət qurumları arasında koordinasiya və məsləhətləşmə platformalarının yaradılması istiqamətində də fəaliyyətlər davam etdirilir.
Kadr Potensialının Artırılması
Nazir müavini kibertəhlükəsizliyin dayanıqlı rəqəmsal inkişafın ən vacib komponentlərindən biri olduğunu vurğulayıb. Bu sahədə ixtisaslı kadr potensialının artırılması məqsədilə İsrailin "Technion" Universiteti ilə əməkdaşlıq çərçivəsində yarımillik təlim proqramı həyata keçirilir. Proqram çərçivəsində 500 mütəxəssisin hazırlanması, yüzlərlə şəxsin isə praktiki məşğələlərə və ixtisasartırma təlimlərinə cəlb olunması nəzərdə tutulub. Əsədov, Azərbaycan Kibertəhlükəsizlik Mərkəzinin məzunlarının hazırda keçirilən kibermüharibə yarışında da iştirak etdiyini əlavə edib.
"Hökumət Buludu" və Rəqəmsal Həllər
Saməddin Əsədov həmçinin, "hökumət buludu" layihəsindən də bəhs edib. O, layihənin əsas provayderi "AzInTelecom" olduğunu və artıq yüzdən çox dövlət qurumunun informasiya sistemlərini "hökumət buludu"na köçürdüyünü bildirib. Hazırda əlavə iki yeni DATA mərkəzin yaradılması istiqamətində işlər aparılır.
Çıxışının sonunda nazir müavini, "AzInTelecom" tərəfindən tətbiq olunan SİMA rəqəmsal həllinin ölkədə rəqəmsal transformasiya üçün mühüm addım olduğunu qeyd edib. Biometriya, kriptoqrafiya və süni intellekt texnologiyalarını birləşdirən bu mobil tətbiqdən artıq 5 milyondan çox vətəndaş istifadə edir və 200-dən artıq hökumət portalına giriş imkanı yaradır.
