Norveç şirkəti 1X Technologies NEO adlı ev humanoid robotu üçün ilkin sifarişləri qəbul etməyə başlayıb. Yeni nəsil robot süni intellektlə idarə olunur və müstəqil şəkildə ev işlərini yerinə yetirə bilir.
NEO robotunun boyu 1,68 metrdir və iki formada təklif olunur — 20 000 ABŞ dollarına birbaşa satınalma və ya aylıq 499 dollarlıq abunə modeli ilə. Robotun hərəkət sistemi Tendon Drive mexanizminə əsaslanır, burada yüksək fırlanma momentli mühərriklər və 3D-polimer amortizasiya təbəqəsi istifadə olunur. Dizayn baxımından NEO suya davamlı geyimdə təqdim edilir ki, bu da insanlarla qarşılıqlı əlaqədə təhlükəsizliyi artırır.
Robot 24,95 kq-a qədər yük qaldıra bilir, səssiz işləmə səviyyəsi isə cəmi 22 desibel təşkil edir. NEO iki 8 meqapiksellik kamera, dörd 360 dərəcə mikrofon və üç dinamiklə təchiz edilib, bu da səsli və vizual ünsiyyət imkanlarını təmin edir.
Süni intellekt sistemi Nvidia Jetson Thor platformasında işləyir və robot bütün dialoqları yadda saxlayır. O, internetə qoşularaq suallara cavab tapmaq, eləcə də 1X mütəxəssislərinin uzaqdan dəstəyi ilə yeni bacarıqlar öyrənmək imkanına malikdir.
29,94 kq çəkisi olan NEO-nun qollarında 22 hərəkət sərbəstliyi dərəcəsi mövcuddur, bu isə ona müxtəlif ev işlərini avtomatik yerinə yetirməyə imkan verir. 5G bağlantısı sayəsində robot həm evdə, həm də açıq havada (quru şəraitdə) işləyə bilir.
Daxili 0,75 kVt/saat tutumlu batareya NEO-ya 4 saata qədər avtonom fəaliyyət imkanı verir. Enerji azalanda isə robot avtomatik olaraq doldurma stansiyasına qayıdır.
Qeyd edək ki, NEO-nun yaradılması barədə məlumat ilk dəfə 2025-ci ilin fevralında açıqlanmışdı, lakin o zaman texniki göstəricilər və satış tarixi məlum deyildi.
