Çoxfunksiyalı insanabənzər robotlar hazırlayan süni intellekt startapı "Figure AI", "Parkway Venture Capital"ın rəhbərlik etdiyi “Series C” raundunda 1 milyard dollarlıq investisiya topladı. Bu investisiya ilə startapın dəyəri 39 milyard dollara yüksəldi.
İnvestisiya raunduna həmçinin "Nvidia", "Macquarie Capital", "Intel Capital", "Align Ventures", "Tamarack Global", "LG Technology Ventures", "Salesforce", "T-Mobile Ventures" və "Qualcomm Ventures" kimi nəhəng şirkətlər də qoşulub.
Startap bu robotların ev işlərindən kommersiya fəaliyyətlərinə qədər geniş sahədə istifadə olunmasını planlaşdırır və onların insanların gündəlik həyatının ayrılmaz bir hissəsinə çevrilməsini hədəfləyir.
ABŞ mərkəzli startap, yeni investisiyanı üç əsas sahədə istifadə etməyi planlaşdırır:
- Genişlənmə: İnsanabənzər robotların evlərdə və kommersiya əməliyyatlarında daha geniş şəkildə istifadəsini təmin etmək.
- Sürətli Təlim: "Nvidia"nın GPU infrastrukturundan istifadə edərək “Helix” adlı süni intellekt sisteminin təlimini sürətləndirmək.
- Məhsuldarlıq: Robotların səmərəliliyini və məhsuldarlığını artırmaq.
“Figure AI”nin qurucusu və CEO-su Brett Adkok, "Yeni tərəfdaşlarımızın qatılması və mövcud investorlarımızın dəstəyi 'Figure'ün bazardakı liderliyini möhkəmləndirir və bu texnologiyanın gündəlik həyatın təbii bir parçası olacağına dair ortaq inancımızı əks etdirir" deyə bildirib.
Startap, "BotQ" istehsal müəssisələrini də genişləndirəcəyini açıqlayıb. Bu addımla "Figure AI", robot texnologiyası bazarında mövqeyini daha da gücləndirməyi planlaşdırır.
