Google-un yaxın zamanda təqdim edilməsi gözlənilən yeni smartfonu Google Pixel 8 Pro-nun xüsusiyyətləri bəlli olub. Google cari cədvəlinə sadiq qalsa, Pixel 8 və Pixel 8 Pro oktyabr ayında Kaliforniyada keçiriləcək xüsusi tədbirdə rəsmi olaraq təqdim olunacaq. Bu hadisəyə təxminən üç ay qalmasına baxmayaraq, bu yaxınlaşan duet haqqında çoxlu sızmalar ortaya çıxıb. Bu gün Pixel 8 Pro-nun ən vacib xüsusiyyətlərinin tam siyahısı açıqlanıb.
Sənayedə sızmalarla məşhur olan Yogesh Brar cihazın təqdimatından aylar əvvəl Google-un yeni flaqmanının ən vacib xüsusiyyətlərini paylaşıb. Google-un 2023-cü il flaqmanı 6,7 düymlük QHD+ 120Hz LTPO OLED displey, xüsusi Titan təhlükəsizlik çipi, Google Tensor G3 SoC, 12 GB RAM, 128/256 GB yaddaş və 4950 mAh tutumlu 27 Vt simli batareya dəstəyi ilə təchiz edilib.
Yeni flaqman çıxdığı gündən etibarən Android 14 əməliyyat sistemini işlədəcək və ultrasəs displeydə olan barmaq izi skanerinə əlavə olaraq infraqırmızı temperatur sensoruna sahib olacaq. Bu şəkildə telefon termometr kimi istifadə edilərək temperaturunuzu ölçə biləcək. Arxa kamera sistemi üç sensordan ibarət olacaq: OIS ilə 50 MP əsas kamera, 64 MP ultra geniş bucaqlı kamera və 48 MP telefoto kamera.
Selfie üçün 11 MP sensordan istifadə ediləcəyi iddia edilir. Daha əvvəl qeyd edilən şayiələrə görə əsas kamera sensoru Samsung-un ISOCELL GN2, telefoto kamera sensoru ISOCELL GM5 və ultra geniş bucaqlı kamera sensoru Sony-nin IMX787 modeli idi. Yogesh Brar tvitində telefonun təqdimat tarixini də qeyd edib. Onun sözlərinə görə, Google-un yeni flaqmanı Pixel 8 Pro və Pixel 8 telefonları bu ilin oktyabrında təqdim olunacaq.
