OpenAI Malta hökuməti ilə “OpenAI for Countries” layihəsi çərçivəsində əməkdaşlıq müqaviləsi imzalayıb. Razılaşmaya əsasən, 2026-cı ilin may ayından etibarən ölkənin bütün sakinlərinə aylıq 20 dollar dəyərində olan ChatGPT Plus xidməti bir il müddətinə pulsuz təqdim ediləcək.
Lakin istifadəçilər əvvəlcə Malta Universiteti tərəfindən hazırlanmış neyroşəbəkələrdən istifadə üzrə məcburi təlim kursunu keçməlidirlər. Bundan sonra xidmətə çıxışın paylanmasına Malta Rəqəmsal İnnovasiyalar İdarəsi nəzarət edəcək.
Pulsuz ChatGPT Plus xidməti xaricdə yaşayan Malta vətəndaşları üçün də əlçatan olacaq. Vətəndaşlığın necə təsdiqlənəcəyi ilə bağlı isə hələlik ətraflı məlumat verilməyib.
OpenAI əməkdaşlığın maliyyə detalları barədə açıqlama verməyib və yeni məlumat mərkəzlərinin tikintisi ilə bağlı hər hansı plan elan etməyib.
