Bu strateji əməkdaşlıq çərçivəsində Nvidia-nın 10 milyard, Microsoft-un isə 5 milyard dollar vəsait ayırması gözlənilir. Bu yeni maliyyələşmə raundu uğurla başa çatarsa, Anthropic-in bazar dəyəri 300 milyard dolları keçərək rekord həddə, hətta bəzi mənbələrə görə 350 milyard dollara çata bilər.
Tərəflər arasındakı razılaşma sadəcə maliyyə investisiya ilə məhdudlaşmır; burada qarşılıqlı öhdəliklər də var. Anthropic, əldə edəcəyi bu dəstəyin qarşılığında Microsoft-un Azure bulud xidmətlərindən istifadə etmək üçün 30 milyard dollar xərcləməyi və Nvidia-nın ən müasir hesablama sistemlərini almağı öhdəsinə götürür. Sövdələşmənin 2025-ci ilin sonu və ya 2026-cı ilin əvvəlində yekunlaşdırılması planlaşdırılır ki, bu da şirkətin əvvəlki 183 milyard dollarlıq dəyərini demək olar ki, ikiqat artıracaq.
Keçmiş OpenAI əməkdaşları tərəfindən yaradılan Anthropic, son dövrlərdə texnoloji yenilikləri ilə diqqət mərkəzindədir. Şirkət bu yaxınlarda 30 saat ərzində avtonom işləyə bilən Claude Sonnet 4.5 modelini və digər yeni alətlərini təqdim edib.
